Ministria e Punëve të Brendshme (MPB) ka bërë të ditur sot se nuk ka persona të dyshuar për vrasjen e djeshme në qytetin e Kumanovës.
Në orët e pasdites, persona të panjohur me një makinë të tipit “Golf” me targa të Shkupit kanë vrarë Endrit Latifin, 31 vjeçarin nga fshati Opajë i Kumanovës. Viktima u vra rreth orës 16.50 para shumë dëshmitarëve në afërsi të Ndihmës së Shpejt në rrugën “11 Nëntori” në Kumanovë.
Sipas policisë, vrasësit kanë shtënë disa herë në drejtim të viktimës dhe menjëherë kanë ikur në drejtim të panjohur. Ndaj tij është shtënë disa herë, duke u goditur nga tetë plumba dhe duke e lënë të vdekur në vendin e ngjarjes. Mjekët e ndihmës shpejtë menjëherë kanë ndërhyrë në vendin e ngjarjes, mirëpo përpjekja e tyre ka qenë e padobishme, pasi që viktima menjëherë ka ndërruar jetë.
Dëshmitarët kanë rrëfyer se viktima me makinën e tij “Ford” po ndiqej nga makina e vrasësve e tipit “Golf” nga drejtimi i lagjes Bedinjë të Kumanovës dhe se në një moment dy makinat janë përplasur. Viktima ka dalur nga makina e tij dhe ka ikur në drejtim të spitalit, mirëpo ai është mbërritur nga vrasësit, të cilët me breshëri plumbash e kanë lënë të vdekur. Më pas vrasësit me shpejtësi të madhe kanë hyrë në makinë dhe kanë ikur në drejtim të Shkupit. Jozyrtarisht policia theksoi se bëhet fjalë për gjakmarrje, ndërsa akoma nuk jepen detaje të tjera. Endrit Latifi, më parë njihej si Gëzim Osmani, por ai kohë më parë kishte ndryshuar identitetin e tij. MPB ka theksuar se po heton ngjarjet dhe ka në dispozicion kamerat që kanë xhiruar makinën e vrasësve. (INA)
